Acompañar la memoria, non parasitala

Somos la memoria que tenemos y la responsabilidá qu’asumimos. Ensín memoria nun esistimos y ensín responsabilidá quiciabes nun merezamos esistir.

José Saramago

Y de sopitu la Memoria tornó a l’axenda política. Ya nun ye la efeméride del 14 d’abril la que mueve les almes al recuerdu de lo que fuimos y lo que nos quitaron de ser. Anguañu vuelve, con cierta fuercia, amenazando de galerna, de penitencia del que quier facer al trote lo que primero nun quixo facer. Como’l neñu que fai los deberes al recréu o que llava los dientes cuatru veces el día que toca dentista.

Siempres pasó, nun ye nuevu, que les oles polítiques miren pales causes y movimientos sociales cuando ven potencial eleutoral, cuando esa causa tien un sofitu popular o una xusticia tan incuestionable que deciden ponela nel centru l’axenda política. Y nun voi ser yo quien proteste porque una causa a la que dedico tanto tiempu y esfuerzu garre puxu y calor mediáticu, pero sí voi cuestionar los intentos pa usurpar, pa mangoniar, pa intentar tutorizar un movimientu social.

Y ye que nun ye cosa de nuevu que dende les fuercies polítiques s’intente instrumentalizar los movimientos sociales. Causes minoritaries o minorizaes, que suxeten la bandera d’un derechu o reclamación, pasen de sópitu a ser esmolición de les fuercies polítiques. Sicasí, como nun diba ser menos, ta pasando agora nuna nueva oleada d’interés pola Memoria Histórica o Democrática. Porque, como con tantes otres coses, hai fuercies polítiques que nes sos rellaiciones colos movimientos sociales confunden apoyar con mangoniar, acompañar con instrumentalizar, collaborar con parasitar.

Hai honroses esceiciones y de tolos colores y niveles. Apoyar ye lo que fizo l’Ayuntamientu de Pravia (PSOE) cuando exhumamos la fosa de La Canalona n’Escoréu. Acompañar ye lo que ta faciendo la Direición de Memoria Democrática del Principáu d’Asturies (PSOE) nos proyeutos que tenemos en marcha per tol país. Collaborar ye lo que de forma exemplar ta faciendo l’Ayuntamientu de Grau (IU) con nos, mano a mano, nos trabayos alrodiu la fosa d’El Rellán en Llantrales.

Na otra cara la moneda tan quienes nun entienden collaborar, apoyar y acompañar. Tan quienes pretenden patrimonializar una memoria pola que nun movieron un déu y piensen más na foto, nel rendimientu eleutoral, qu’en puxar pol derechu a la verdá, tan esencial nos tiempos escuros que nos toquen vivir.

Na recuperación de la Memoria d’esti país cabemos toles persones que, dende la diversidá, trabayamos, esfuerciámonos y sumamos pa construyir esa memoria pública y militante. Ye de quien investiga, de quien documenta, de quien quita tiempu al sueñu pa percorrer Asturies sintiendo hestories tristes o lleendo papeles enllenos de mofu. Ye tamién de los que reivindiquen garrar el testigu pa construyir una sociedá meyor. Ye de les families que busquen q los de so y de los que reivindiquen lo colectivu de la causa. Porque nin les investigaciones ñacen d’un árbol, nin les foses s’exhumen soles. Sobra quien parasita’l trabayu ayenu, quien xuega al Monopoly coles ilusiones y esperances de tanta xente.

Una causa tan noble nun merez ser emporcada por quien busca interés espureo n’ello.

Autor entrada: david

Deja una respuesta

Tu dirección de correo electrónico no será publicada. Los campos obligatorios están marcados con *

Este sitio usa Akismet para reducir el spam. Aprende cómo se procesan los datos de tus comentarios.